banner

ክብረ በዓል ገዳም ወግረ ስኂን ኣቡነ እንድርያስ ዕፉን ተኸቢሩ!

ክብረ በዓል ገዳም ወግረ ስኂን ኣቡነ እንድርያስ ዕፉን ተኸቢሩ!

ከምቲ ዓመት መጸ ዝኽበር፡ ሎሚ ዓመት ድማ 29 ጥር 2008 ዓ.ም. ክብረ በዓል ገዳም ወግረ ስኂን ኣቡነ እንድርያስ ዕፉን ተኸቢሩ። ኣብዚ ክብረ በዓል’ዚ ኣበምኔት ገዳማት፡ ሊቃውንት መዘምራንን ካህናትን ዲያቆናትን ምእመናንን ምእመናትን ሕዝበ ክርስቲያን ተሳተፍቲ በረኸት ኣቡነ እንድርያስ ዕፉን ኮይኖም።

ንኽብሪ እዚ በዓል እዚ ካብ ዋዜማ ከምኡ’ውን ናብ 29 ጥር ዘውግሕ ለይቲ ብሊቃውንት መዘምራንን ውሉደ ክህነትን ስብሐተ ማኅሌትን መዝሙር ሰንበትን ጸሎተ ሰዓታትን ምንባብ መጻሕፍትን በጺሑ። 6፡30 ቅ.ቀ. ብኣበምኔት ገዳም ደብረ ድማኅ ኣቡነ መርቆሬዎስ መምህር ዘሚካኤል ዝተመርሐ ጸሎተ ቅዳሴ ምስ ዓረገ፡ ታቦት ሠለስተ ጊዜ ብመዝሙር እናተዓጀበ ዘይሩ። ታቦት ዘይሩ ኣብ ዓውደ ምሕረት ምስ ቆመ፡ መምህር ዘሚካኤል ነቲ በዓል ዝምልከት ምስ ታሪኽ ኣቡነ እንድርያስ ዕፉን ብምትእስሳር ሰፊሕ ስብከተ ወንጌል ድኅሪ ምሃብ፡ እዚ ገዳም’ዚ ብሓፈሻ ብዅሉ ሕዝበ ክርስቲያን ብፍላይ ድማ ብከባቢ እቲ ዓዲ ቆላሕታ ኽግበረሉ ከምዝግባእ ኣዘኻኺሮም። ብድኅር’ዚ ‘ሰላመ አብ’ ምህለላ በጺሑ፡ ታቦት ብጣዕመ ዜማ ተዓጂቡ ኣብ ክብሪ ቦታኡ ኣትዩ። በዚ ኸኣ ናይቲ በዓል ፍጻሜ ኮነ።

ተውሳክ፡ . . . ክብረ በዓል ገዳም ወግረ ስኂን ኣቡነ እንድርያስ ዕፉን ተኸቢሩ!

ኣስተርእዮ ማርያም ከምኡ’ውን ዝኽረ በዓል ኣቡነ ሉቃስ ጻድቅ ኣብ ሓበላ ዞባ ጋሽ ባርካ ተባዒሉ!

በስመ አብ ወወልድ ወመንፈስ ቅዱስ አሐዱ አምላክ!

‘ኣስተርእዮ ማርያም 21 ጥር’ ኣብ ውሽጥን ወፃእን፡ ኣብ ከተማን ገጠርን ብሓፈሻ ኣብ ኵለን ገዳማትን ኣብያተ ክርስቲያንን ተኸቢሩ ውዒሉ። ብፍላይ ግና ኣብታ ኣብ መንገዲ ኣሥመራ - ሊባን፡ ካብ ኣሥመራ 50 ኪ.ሜ. ትርከብ ‘ሓበላ’ ትብሃል ዓዲ፡ ኣስተርእዮ ማርያም ከምኡ’ውን ዝኽረ በዓል ጻድቅ ኣቡነ ሉቃስ ብዝኂ ምእመናን ምእመናትን ኣብ ዝተረኽብሉ ተባዒሉ። 21 ጥር ታቦት ናይ ብስም ቅድስት ድንግል ማርያም ትጽዋዕ ቤተ ክርስቲያን (ሓበላ)፡ ናብ ዓፅሚ ናይ ሓደ ባሕታዊ ኣቦ ኣቡነ ሉቃስ ብኽብሪ ዓሪፍሉ ዘሎ ቅዱስ መካን ብምውሳድ ብኽብሪ ይበዓል። ጻድቅ ኣቡነ ሉቃስ፡ ድኅሪ ናይ ነዊኅ ዓመታት ተጋድሎን ትሩፋትን ኣብ በጋይት እትበሃል በረኻ ምስ ዓረፈ፡ ደኃሪ ጊዜ ጭደል (ኣጓጕል ዝፆታኣ ንማሕረስ እትዝውተር ላም) መጺኣ ነቲ ዓፅሙ ልሒሳ ፀኒሳ ወለደት። በዚ ዝተገረመ ጓሳኣ ናብ ዓዱ ከይዱ ብዓፅሚ ጻድቅ ኣቡነ ሉቃስ ዝተፈጸመ ተኣምር ምስ ነገሮም፡ ንበረኸት ክኾኖም ነቲ ዝተበታተነ ኣዕፅምቲ ኣቡነ ሉቃስ ኣብ ሳንዱቕ ኣእትዮም ናብ ዓዶም ተሰኪሞም እናኣምጽእዎ ከለዉ ኣብ መንገዲ ከም እምኒ ተሪሩን ከቢዱን ምኻድ ከልኦም። ‘ኣይመነናን ኣይመነናን’ ዝብል ድምፂ ምስ ሰምዑ ግና ‘ናብ ኣይመነናንዝበሓል ቦታ እዩ ደልዩ’ ኢሎም ምስ ኣልዓልዎ ግና ፈዂስሎም ኣብዚ ቦታ ኣብጽሕዎ። ፍቓድ እግዚአብሔር ምዃኑ ዝምስክር ድማ ኣብዚ ቦታ ምስ በጽሑ ላሕሚ ብሓረግ ተኣሲራ ረኸቡ። ‘እግዚኣብሔር እዩ ሰዲዱልና’ ኢሎም ጸሎት ኣብጺሖም በታ ላሕሚ ኣተዝኪሮም ቀበርዎ። ካብዚ ጊዜ’ዚ ጀሚሩ ኸኣ ዝኽረ በዓሉ ምስ ኣስተርእዮ ማርያም 21 ጥር እናተገብረ ይነብር ኣሎ። ኣብዚ ዓፅሚ ኣቡነ ሉቃስ ብኽብሪ ዓሪፍሉ ዘሎ ቦታ፡ ብማየ ጸሎትን ጸበልን ብዙኃት ሕሙማት ይሓውዩን ዝተፈላለየ ተኣምራት ይግበርን እዩ።

ተውሳክ.... ኣስተርእዮ ማርያም ከምኡ’ውን ዝኽረ በዓል ኣቡነ ሉቃስ ጻድቅ ኣብ ሓበላ ዞባ ጋሽ ባርካ ተባዒሉ!

በዓለ ዕረፍተ ሥጋሃ ለማርያም ተኸቢሩ!

ዓመት መጸ 21 ጥር፡ ‘ኣስተርእዮ’ እናተባህለ ዝኽበር በዓለ ዕረፍተ ሥጋሃ ለማርያም ሎሚ ዓመት’ውን 21 ጥር 2008 ዓ.ም. ኣብ ኵለን ኣብያተ ክርስቲያን ብዝማሬን ማኅሌትን፡ ብቅዳሴን ውዳሴን፡ ብሓፈሻ ብመንፈሳዊ ሥነ ሥርዓት ተባዒሉ። ብፍሉይ ንምጥቃስ ግና ኣብ ቅድስት ማርያም ቤተ ክርስቲያን ባጽዕ ካብ ዋዜማ ጀሚሩ ክሳዕ ናብ 21 ጥር ዘውግሕ ለይቲ ንእግዚአብሔር ዘመስግን፡ ንቅድስት ድንግል ማርያም ዝውድስ፡ ንዅሉ ዓለም ሰላምን ፍቕርን ዘውርድ ስብሐተ እግዚአብሔር በጺሑ። ጸሎተ ቅዳሴ ምስ ተሠርዐ’ውን ብኽብሪ ተዓጂቡ ታቦት ዘይሩ። ጥዑማነ ልሳን ሊቃውንት መዘምራን ጣዕመ ዜማ ኣስሚዖም ምስ ወረቡ፡ ተመሃሮ ትምህርተ ሰንበት ከኣ መዝሙር ምስጋናን ጸሎትን ኣቕሪቦም። ቀጺሉ ነቲ በዓል ዝምልከት ስብከተ ወንጌልን ቃለ ቡራኬን ምስ ተዋህበ፡ ብጸሎተ ምህላ እቲ ሥነ ሥርዓት ተፈጺሙ ታቦት ናብ ክብሪ ቦታኡ ኣትዩ።

ተውሳክ....በዓለ ዕረፍተ ሥጋሃ ለማርያም ተኸቢሩ!

‘ ግበሩ ተዝካርየ ምስለ ማርያም እምየ ’

ክብረ በዓል ገዳም ኣቡነ ዮናስ ተባዒሉ!

‘ግበሩ ተዝካርየ ምስለ ማርያም እምየ/ ዝኽረይ ምስ ኣደይ ማርያም ግበሩለይ’ ብዝበሎ መሠረት ከምቲ ዓመት መጸ ዝግበር ሎሚ ዓመት ድማ ክብረ በዓል ኣቡነ ዮናስ፡ ኣብ ገዳም ደብረ ድኁኃን ምስ ኣስተርእዮ ወበዓለ ዕረፍታ ለማርያም ብ21 ጥር ብኽብሪ ተባዒሉ። ኣብዚ ክብረ በዓል’ዚ ዋና ጸሓፊ ቅዱስ ሲኖዶስ ኣቡነ ሉቃስ ኣብ ዝተረኽብሉ፡ ሊቃውንት መምህራንን ካህናትን ዲያቆናትን ምእመናንን ምእመናትን ሕዝበ ክርስቲያን ናይ ኣቡነ ዮናስ በረኸት ተሳተፍቲ ኮይኖም።

ንኽብሪ እዚ በዓል እዚ ካብ ዋዜማ ከምኡ’ውን ክሳዕ ናብ 21 ጥር ዘውግሕ ለይቲ ብሊቃውንት መዘምራንን ውሉደ ክህነትን ስብሐተ ማኅሌትን ጸሎተ ሰዓታትን ምንባብ መጻሕፍትን በጺሑ። ‘ ሰአል ለነ ዮናስ አቡነ ማኅቶተ ገዳም ዘታፈለፍል ዘይተ ከመ ሰሊሆም እም ከርሠ መቃብር ኅቱም/ ከም ሰሊሆም ካብ ኅቱም መቓብር ዘይቲ እተፈልፍል ብርሃን ገዳም ዝኾንካ ኣቦና ዮናስ ለምነልና’ እናበሉ ነቲ ምልክት ቅድስናኡ ካብ መቓብሩ ዘይቲ ዘፈልፈለ ጻድቕ ኣቡነ ዮናስ ዘኪሮም።

ተውሳክ....‘ ግበሩ ተዝካርየ ምስለ ማርያም እምየ ’

“እም አፈ ደቂቅ ወሕፃናት አስተዳሎከ ስብሐተ”

ክብረ በዓል ቅዱስ ቂርቆስ ወኢየሉጣ

ከምቲ ኵሉ ጊዜ ዓመት መጸ ዝበዓል ሎሚ ዓመት'ውን ክብረ በዓል ቅዱስ ቂርቆስ ወኢየሉጣ ጥር 15, 2008 ዓ.ም. ብምዕሩግ መንፈሳዊ ሥነ ሥርዓት ከቢሩ ውዒሉ።
ብፍላይ ግና ኣብ ሃገረ ስብከት ኣሥመራ ዝርከብ ቤተ ክርስቲያን ደብረ መንክራት ቅዱስ ቂርቆስ ማይ ጭሖት ብፁዕ ኣቡነ ባስልዮስ ዋና ኣመኃዳሪ መንበረ ፓትርያርክ ኦርቶዶስክ ተዋሕዶ ቤተ ክርስቲያን፡ ብፁዕ ኣቡነ ኣትናቴዎስ ጳጳስ ዘገዳማት፡ ኣበምኔታት ገዳማትን ብዙኃት ገዳማውያንን ውሉደ ክህነትን ምእመናንን ምእመናትን ኣብ ዝተረኽቡሉ ተኸቢሩ።
ኣቐዲሙ ብዝወፀ መርሓ ግብር፡ ካብ ዋዜማ ጀሚሮም ሊቃውንትን ውሉደ ክህነትን ናብ ሰማይ ብተመስጦ ዝወስድ ያሬዳዊ ስብሐተ እግዚአብሔር ክዝምሩን ከሸብሽቡን ከለዉ፡ ካብተን ኣዴታት ዘየቋርጽ ዕልልታን ካብ ኣቦታት ድሙቕ ጣቒዒትን ይስማዕ ነበረ።

Read more: “እም አፈ ደቂቅ ወሕፃናት አስተዳሎከ ስብሐተ”

በዓለ ጥምቀት ብምዕሩግን ድሙቕን መንፈሳዊ ሥነ ሥርዓት ተኸቢሩ!

ዓመት መጸ ዝኽበር፡ ጐይታናን መድኃኒናን ኢየሱስ ክርስቶስ ዝተጠምቀሉ 11 ጥር ሎሚ ዓመት’ውን ብምዕሩግን ድሙቕን መንፈሳዊ ሥነ ሥርዓት ኣብ ኵለን ኣብያተ ክርስቲያን ተኸቢሩ።
ብፍላይ ኣብ ሃገረ ስብከት ኣሥመራ ባሕረ ጥምቀት (ሜዳ ባሕቲ መስከረም)፦ ብፁዓን ጳጳሳት ኣቡነ ሉቃስ ዋና ጸሓፊ ቅዱስ ሲኖዶስን ጳጳስ ሀገረ ስብከት ድባርዋ፡ ብፁዕ ኣቡነ ጴጥሮስ ጳጳስ ሃገረ ስብከት ማእከል ከምኡ’ውን ሊቃውንት መዘምራን፡ ውሉደ ክህነት፡ ተማሃሮ ትምህርተ ሰንበት፡ ምእመናንን ምእመናትን ኣብ ዝተረኽብሉ ተባዒሉ።

ነቲ ጐይታናን መድኃኒናን ኢየሱስ ክርስቶስ ንኽጥመቕ ናብ ማየ ዮርዳኖስ ዝወረዶ ንምዝካር፡ ኣብ ዋዜማ’ቲ በዓል ናይ ኣብ ኣሥመራ ዝርከባ ሸሞንተ ኣብያተ ክርስቲያን ታቦታት ማለት ርእሰ ኣድባራት ደብረ ጽዮን ቅድስት ማርያም፡ ደብረ ብርሃን ቅድስት ሥላሴ (ዕዳጋ ኃሙስ)፡ ደብረ ብሥራት ቅዱስ ገብርኤል (ኣኽርያ)፡ ደብረ ሣህል ቅዱስ ሚካኤል(ቤት መኻእ)፡ ደብረ ግዕዛን መድኃኔዓለም (ገዛ ባንዳ)፡ ደብረ ፀሐይ ኣቡነ ተክለሃይማኖት(ኃዝኃዝ)፡ መካነ ሰማዕት ቅዱስ ጊዮርጊስ (ቲራቮሎ)ን ደብረ ምሕረት ኣቡነ ገብረ መንፈስ ቅዱስ (ኣኽርያ)ን ናብ ባሕረ ጥምቀት (ሜዳ ባሕቲ መስከረም) ወሪዶም። ናይዚ ምሳሌ ድማ ታቦት ዝተሰከሙ ካህናት ብቅዱስ ዮሓንስ፡ እቲ ናብ ማየ ጥምቀት ዝወረደ ታቦት ድማ በቲ ንኽጥመቕ ናብ ማየ ዮርዳኖስ ዝኸደ ጐይታና ኢየሱስ ክርስቶስ ይምሰል።

Read more: በዓለ ጥምቀት ብምዕሩግን ድሙቕን መንፈሳዊ ሥነ ሥርዓት ተኸቢሩ!

Our Faith

The Eritrean Orthodox Tewahdo Church is the one Apostolic and Universal, and, for authenticatitly,ng righ
A.  It is stated as ‘Eritrean’ for it is located  within Eritrea’s sovereign integrity, 
B.  And it is affirmed that it is ‘Orthodox’ for  the Church has the true faith,
C.  And is called ‘Tewahdo’ for it believes   Read More . . . 

ርኸቡና

ኦርቶዶክስ ተዋሕዶ ቤተ ክርስቲያን ኤርትራ
ፖ.ሳጹን ቁጽሪ 728
ኣስመራ፡ ኤርትራ
ቴለ፡ +291-1-184290/182270
ፋክስ፡ +291-1-182195