banner

በዓለ ጥምቀት ብምዕሩግን ድሙቕን መንፈሳዊ ሥነ ሥርዓት ተኸቢሩ!

ዓመት መጸ ዝኽበር፡ ጐይታናን መድኃኒናን ኢየሱስ ክርስቶስ ዝተጠምቀሉ 11 ጥር ሎሚ ዓመት’ውን ብምዕሩግን ድሙቕን መንፈሳዊ ሥነ ሥርዓት ኣብ ኵለን ኣብያተ ክርስቲያን ተኸቢሩ።
ብፍላይ ኣብ ሃገረ ስብከት ኣሥመራ ባሕረ ጥምቀት (ሜዳ ባሕቲ መስከረም)፦ ብፁዓን ጳጳሳት ኣቡነ ሉቃስ ዋና ጸሓፊ ቅዱስ ሲኖዶስን ጳጳስ ሀገረ ስብከት ድባርዋ፡ ብፁዕ ኣቡነ ጴጥሮስ ጳጳስ ሃገረ ስብከት ማእከል ከምኡ’ውን ሊቃውንት መዘምራን፡ ውሉደ ክህነት፡ ተማሃሮ ትምህርተ ሰንበት፡ ምእመናንን ምእመናትን ኣብ ዝተረኽብሉ ተባዒሉ።

ነቲ ጐይታናን መድኃኒናን ኢየሱስ ክርስቶስ ንኽጥመቕ ናብ ማየ ዮርዳኖስ ዝወረዶ ንምዝካር፡ ኣብ ዋዜማ’ቲ በዓል ናይ ኣብ ኣሥመራ ዝርከባ ሸሞንተ ኣብያተ ክርስቲያን ታቦታት ማለት ርእሰ ኣድባራት ደብረ ጽዮን ቅድስት ማርያም፡ ደብረ ብርሃን ቅድስት ሥላሴ (ዕዳጋ ኃሙስ)፡ ደብረ ብሥራት ቅዱስ ገብርኤል (ኣኽርያ)፡ ደብረ ሣህል ቅዱስ ሚካኤል(ቤት መኻእ)፡ ደብረ ግዕዛን መድኃኔዓለም (ገዛ ባንዳ)፡ ደብረ ፀሐይ ኣቡነ ተክለሃይማኖት(ኃዝኃዝ)፡ መካነ ሰማዕት ቅዱስ ጊዮርጊስ (ቲራቮሎ)ን ደብረ ምሕረት ኣቡነ ገብረ መንፈስ ቅዱስ (ኣኽርያ)ን ናብ ባሕረ ጥምቀት (ሜዳ ባሕቲ መስከረም) ወሪዶም። ናይዚ ምሳሌ ድማ ታቦት ዝተሰከሙ ካህናት ብቅዱስ ዮሓንስ፡ እቲ ናብ ማየ ጥምቀት ዝወረደ ታቦት ድማ በቲ ንኽጥመቕ ናብ ማየ ዮርዳኖስ ዝኸደ ጐይታና ኢየሱስ ክርስቶስ ይምሰል።

Read more: በዓለ ጥምቀት ብምዕሩግን ድሙቕን መንፈሳዊ ሥነ ሥርዓት ተኸቢሩ!

ክብረ በዓል ኣጋዕዝተ ዓለም ሥላሴ ተኸቢሩ!

ዓመታዊ ክብረ በዓል ኣጋዕዝተ ዓለም ሥላሴ ጥሪ 7, 2008 ዓ.ም. ታቦቶም ኣብ ዘለዎ ኣብያተ ክርስቲያን ተኸቢሩ።
ብፍላይ ድማ ኣብ ደብረ ብርሃን ቅድስት ሥላሴ ቤተ ክርስቲያን ዕዳጋ ኃሙስ፡ ብፁዕ ኣቡነ ሉቃስ ዋና ጸሓፊ ቅዱስ ሲኖዶስን ጳጳስ ሀገረ ስብከት ዱባርዋን፣ ብፁዕ ኣቡነ ባስልዮስ ዋና ኣመኃዳሪ መንበረ ፓርትያርክን ጳጳስ ሀገረ ስብከት ዓንሰባን፡ ብፁዕ ኣቡነ ጴጥሮስ ጳጳስ ሀገረ ስብከት ማእከልን፣ ኣካያዲ ሥራሕ ሀገረ ስብከት ኣሥመራ ሊቀ ካህናት ኣሮንን፣ ኣበምኔት ገዳማትን፣ ሊቃውንቲ መምህራንን ውሉደ ክህነትን፡ ተመሃሮ ትምህርቲ ሰንበት መንእሰያትን ሕፃናትን ምእመናንን ምእመናትን ኣብ ዝተረኽብሉ ብመንፈሳዊ ድሙቕ ሥነ ሥርዓት ተኸቢሩ።

ካብ ዋዜማ 6 ጥሪ ሰዓት 1፡00 ድ.ቀ. ጀሚሮም ሊቃውንት መዘመራን ነቲ በዓሉ ዝምልከት ስብሓታትን ቅኔታትን ብዝግባእ ሥነ ሥርዓት ቆይሞም።
ካብኡ’ውን ናብ ቀዳም 7 ጥሪ ዘውግሕ ለይቲ ካብ ሰዓት 9፡00 ድ.ቀ. ጀሚሮም፡ ብርሃናተ ቤተ ክርስቲያን ሊቃውንትን መዘምራንን ውሉደ ክህነትን ነቲ በዓል ዝምልከት ስብሐተ ማኅሌትን ንባባት ቅዱሳት መጻሕፍትን ክሳዕ ሰዓት 6፡30 ቅ.ቀ. ከብጽሑ ኃዲሮም።

ተውሳክ፡ . . . ክብረ በዓል ኣጋዕዝተ ዓለም ሥላሴ ተኸቢሩ!

ቅድስት ማርያም መግደላዊት

ኣብ ሃገርና ኤርትራ ንበይና ብስም ቅድስት ማርያም መግደላዊት ትጽዋዕ ቤተ ክርስቲያን ኣላ። እዛ ደብረ ማርያም መግደላዊት ዓዲ ደቂ ወራሲ ትብሃላ ቤተ ክርስቲያን’ዚኣ ኣብ ከባቢ ዓረዛ ጥቃ ገዳም ደብረ ድማኅ ኣቡነ መርቆሬዎስ ትርከብ ኮይና ዕድመኣ ዳርጋ ምስ ደብረ ድማኅ ኣቡነ መርቆሬዎስ ምዃኑ ይንገር። ክብረ በዓል ናይዛ ደብሪ’ዚኣ ብ6 ጥርን 6 ነሓሴን ዝኽበር ኮይኑ ሎሚ ዓመት 6 ጥር 2008 ዓ.ም. ድማ ካብ ከባቢ ዓዲ ደቂ ወራስን ካብ ኣሥመራን ናብ ዓዲ ደቂ ወራሲ ዝመጹ ውሉደ ክህነትን ምእመናንን ምእመናትን ካብ ቅድስት ማርያም መግደላዊት በረኸት ንምርካብ ኣብቲ ክብረ በዓል ተሳቲፎም ነይሮም።

ተውሳክ፡ . . . ቅድስት ማርያም መግደላዊት

ክብረ በዓል ደብረ ወርቅ ኣቡነ ሊባኖስ ሃም ተባዒሉ!

ዓመት መጸ ብምኽንያት ዕረፍቲ ኣቡነ ሊባኖስ ዝኸብር 3 ጥሪ ክብረ በዓል ደብረ ወርቅ ኣቡነ ሊባኖስ ሃም ሎሚ ዓመት’ውን ብድምቀት ተባዒሉ። ካብ በረኸትን ቃል ኪዳንን ኣቡነ ሊባኖስ ንምስታፍ፡ ኣብ ገዳም ደብረ ወርቅ ኣቡነ ሊባኖስ፡ ብፁዕ ኣቡነ ሉቃስ ዋና ጸሓፊ ቅዱስ ሲኖዶስ፡ ኃላፊ ኣድያማተ ስብከት ሊቀ ካህናት ዘሚካኤል ኣብርሃም፡ ካብ ዝተፈላለየ ቦታታት ዝመጹ ገዳማውያን ኣቦታትን ኣዴታትን ሊቃውንትን ውሉደ ክህነትን፡ ምእመናንን ምእመናትን ተረኺቦም ነይሮም።

ካብ ዋዜማ ብድሮ ዕለት 2 ጥሪ ነቲ ናይ ጻድቅ በዓል ምስ ልደት ብምስናይ ስብሐተ እግዚአብሔርን ቅኔታትን ብሊቃውንቲ በጺሑ። ብድኅሪ ዋዜማ ካብ ሰዓት 8፡00 ምሸት ጀሚሩ ስብሐተ ማኅሌትን ጸሎተ ሰዓታትን ብተመስጦ ዘኅድር ኵነታት ብሊቃውንት መዘምራንን ገዳማውያን ኣበውን ምእመናንን ክበጽሕ ኃዲሩ።

ብመሠረት መርሐ ግብር ታቦተ ሕጉ ሰዓት 10፡00 ወፂኡ፡ 3ተ ጊዜ ምስ ዖደ፡ ሊቃውንት መዘምራን “ወተቀበልዎ መላእክት አብእዎ ኢየሩሳሌም/ መላእክት ተቐቢሎም ኣብ ሰማያዊት ኢየሩሳሌም ኣእትዮሞ” እናበሉ ወሪቦም። ብድኅር’ዚ ኃላፊ ኣድያማተ ስብከት ሊቀ ካህናት ዘሚካኤል ኣብርሃም፡ ምስ ታሪኽ ኣቡነ ሊባኖስ ብምትኅኃዝ ሰፊሕ ትምህርቲ ምስ ተዋህበ፡ ብብፁዕ ኣቡነ ሊቃስ ቃለ ምዕዳንን ብራኬን ተዋሂቡ ፡ ጸሎተ ምህላ ተገይሩ ታቦት ናብ ክብሪ መንበሩ ኣተወ።

ኣብ መወዳእታ ጊዜ ጸሎተ ቅዳሴ ኮይኑ፡ ብብፁዕ ኣቡነ ሉቃስ ዝተመርሑ ቀዳስያን ቅዳሴ ምስ ተሠርዐ፡ ብገዳምን ብከባቢ ዓድን ዝተዳለወ መኽፈልቲ ኵሉ ነጋዳይ ምስ ተኻፈለ ናይ’ቲ በዓል ፍጻሜ ኮነ።

ክብረ በዓል አቡነ ተክለሃይማኖት ተኸቢሩ!

‘መንክር እግዚአብሔር በላዕለ ቅዱሳኒሁ’

ክብረ በዓል አቡነ ተክለሃይማኖት 24 ታኅሣሥ ኣብ ኵለን ብስሞም ዝተሰየማ ኣብያተ ክርስቲያናት ክዝከር ከሎ፡ ብፍሉይ ግና ኣብ ሃገረ ስብከት ኣሥመራ፡ ደብረ ፀሐይ አቡነ ተክለሃይማኖት ቤተ ክርስቲያን (ሓዝሓዝ) ብድሙቕ መንፈሳዊ ሥነ ሥርዓት ተኸቢሩ።
ካብ ድሮ’ቲ በዓል ዕለት 23 ታኅሣሥ ካብ ሰዓት 12፡30 ድ.ቀ. - 5፡00 ድ.ቀ. ሥርዓተ ዋዜማ፡ ስብሐተ እግዚአብሔር በጺሑ። መምህራን ሊቃውንት፡ ተማሃሮ ደቀ መዛሙርት፡ ውሉደ ክህነትን ምእመናን ኣቦታትን ኣዴታትን ከምኡ’ውን ልሳኖም ንጩሀት ኣእጋሮም ንቁመት ዘይበጽሐ ሕፃናት ኣብ ዝተሳተፍሉ ሥርዓተ ዋዜማ፡ ‘ብፁዕ ውእቱ ኣባ ተክለሃይማኖት ከሠተ ለነ ብርሃነ ዜናሁ ለመድኃኒነ/ ናይ ጐይታናን መድኃኒናን ኢየሱስ ክርስቶስ ብሥራት ወንጌል ሰበኸልና፡ ኣባ ተክለሃይማኖት ንኡድ ክቡር’ዩ’ እናበሉ ኣዝይሞም። ኣብ መንጎ መንጎ ብዜማ ‘መስተብቍዕ በእንተ እለ ይነግዱ (ጸሎት ምእንቲ ዝገሹ) ፡ መስተብቍዕ በእንተ ዝናማት (ጸሎት ምእንቲ ዝናማት) ከምኡ’ውን መስተብቍዕ በእንተ ንጉሥ (ጸሎት ምእንቲ መራሒ ሃገር)’ እናተጸለየ፡ ዓበይቲ መምህራን ሊቃውንት’ውን ሓደ ድኅሪ ሓደ ቅኔ ገይሮም። ኣብ መወዳእታ ካብ ቅዱሳተ መጻሕፍት ምስ ተነበን ዚተረፉ ጸሎታት ምስ በጽሐን ‘ኢትግድፈነ ወኢትመንነነ ኣምላከ ሰላም ተራድአነ/ ኣምላኽ ሰላም እግዚአብሔር ርድኣና ደኣ እምበር ፈጺምካ ኣይትግድፈና’ እናበሉ ብጸሎት እግዝእትነ ማርያምን ኣቡነ ተክለሃይማኖትን ንእግዚአብሔር ተማኅፂኖም። ሥርዓተ ዋዜማ ምስ ተፈጸመ፡ ምሸት ብእዋኑ ተደዊሉ ሊቃውንት መዘምራንን ውሉደ ክህነትን ምእመናንን ምእመናትን ስብሐተ ማኅሌት ዘሌሊትን መዝሙር ዘሰንበትን ከብጽሑ ኃዲሮም።

Read more: ክብረ በዓል አቡነ ተክለሃይማኖት ተኸቢሩ!

መበል 12 ዓመት ዓመታዊ በዓል ቤት ትምህርቲ ሰንበት ደብረ ሰላም ቅዱስ ሚካኤል ባረንቱ ተቓኒዑ።

መበል 12 ዓመት ዓመታዊ በዓል ቤት ትምህርቲ ሰንበት ደብረ ሰላም ቅዱስ ሚካኤል ባረንቱ ተቓኒዑ።

ቤት ትምህርቲ ሰንበት ደብረ ሰላም ቅዱስ ሚካኤል ባረንቱ “ብመንፈስ ንበሩ እሞ ትምኒት ሥጋ ኣይኪትፍጽሙን ኢኹም” (ገላ. 5፡16) ኣብ ትሕቲ ዝብል መሪሕ ኣርእስቲ ብሰንበት 17 ታኅሣሥ 2008 ዓ.ም.ግ. መበል 12 ዓመት ዓመታዊ በዓሉ ኣቃኒዑ።
እቲ ዓመታዊ በዓል ዓርቢ 15 ታኅሣሥ 2008 ዓ.ም.ግ. “መራኸቢ ብዙኃን ኣብዚ እዋን እዚ ከመይ ንጥቀመሉ ኣሎና፧” ብዝብል ዘተ መንእሰያት ተጀሚሩ። ተዛተይቲ ኣብቲ ኣርእስቲ ኣተኲሮም “ኣጠቓቕማና ጕድኣቱ’ዶ ይዛይድ ወይስ ጥቕሙ፧” ብምባል ብመንፈሳዊ፡ ባህላዊ፡ ጥዕናውን ማኅበራውን መዳያት ብዕምቈት ድኅሪ ምዝታይ ኣብዚ እዋን እዚ ኣብ ኣጠቓቕማና ጕድኣቱ ይበዝኅ ስለዘሎ፡ ጕድኣቱ ኣጕዲልና ጥቕሙ ከነዕቢ ዝሕግዙና ብርክት ዝበሉ ምኽርታት ድኅሪ ምዝርዛር ኣብ መወዳእታ ብመጽናዕታዊ ጽሑፍ ዝተሰነየ መጠቓለሊ ሓሳብ ብማኅበር ተዋሂቡ።
ኣብቲ ሰንበት 17 ታኅሣሥ 2008 ዓ.ም.ግ. ዝተገብረ መንፈሳዊ ጉባኤ ብጸሎትን ብናይ ዕለቱ ወንጌልን ድኅሪ ምጅማሩ፡ በቶም ኣብዚ ትምህርተ ሰንበት ተዀስኲሶም ዝዓብዩ ዘለዉ ሕፃናት መዝሙር ቀሪቡ። መንፈሳዊ ትምህርቲ ምስ ተዋህበ መዝሙር ብዓበይቲ መዘምራን ቀሪቡ። ከምኡ’ውን መንፈሳዊ ተዋስኦ፡ ግጥሚ ብሕፃናትን መዝሙር ብሰብ ሓዳር ኣቦታትን ኣዴታትን ብተኸታታሊ ምስ ቀረበ፡ እቲ ጉባኤ ብኣባታዊ ምኽርን ጸሎትን ኣቦታት ተዛዚሙ።
ብሓፈሻ እዚ ዝተቓንዐ ጉባኤ እዚ፡ ኣብ ባይታ ዘሎ ኵነታት ኣካይዳና ናብ ሥጋ ዝዛየደ ብምህላዉ፡ ነዚ እዋን እዚ ኣለሊና ብሃይማኖትና ክንጸንዕን ኣብ ግብሪ ጽድቂ ክንተግህን ዝምህር መደብ እዩ ነይሩ።

Our Faith

The Eritrean Orthodox Tewahdo Church is the one Apostolic and Universal, and, for authenticatitly,ng righ
A.  It is stated as ‘Eritrean’ for it is located  within Eritrea’s sovereign integrity, 
B.  And it is affirmed that it is ‘Orthodox’ for  the Church has the true faith,
C.  And is called ‘Tewahdo’ for it believes   Read More . . . 

ርኸቡና

ኦርቶዶክስ ተዋሕዶ ቤተ ክርስቲያን ኤርትራ
ፖ.ሳጹን ቁጽሪ 728
ኣስመራ፡ ኤርትራ
ቴለ፡ +291-1-184290/182270
ፋክስ፡ +291-1-182195