ልኡክ ቅዱስ ሲኖዶስ ኣብ ማእከላይ ምሥራቅ ሓዋርያዊ ዑደት የካይድ ኣሎ!

ብዋና ጸሓፊ ቅዱስ ሲኖዶስ ብፁዕ ኣቡነ ሉቃስን ተሓጋጋዛይ ዋና ኣመሓዳሪ መንበረ ፓትርያርክ ዲያቆን ግርማይ ዘርኣይን ዝተመርሐ ልኡክ ቅዱስ ሲኖዶስ ንሓዋርያዊ ዑደት ናብ ማእከላይ ምሥራቅ ኣብ ዝርከባ ኣብያተ ክርስቲያን ኃሙስ 17 ጥቅምት 2009 ዓ.ም. ገይሹ።

ልኡክ ቅዱስ ሲኖዶስ፡ ኣብዚ ንሓደ ሰሙን ዝጸንሕ መገሻኡ፡ ኣብ ዱባይን ኣቡዳብን ዝርከባ ኣብያተ ክርስቲያን ምብጻሕ ሥራሕ ከኻይድን ቡራኬን ምዕዳንን ንሕዝበ ክርስቲያን ክህብን እዩ።

ቅዱስ ሲኖዶስ ምብጻሕ ሥራሕ ኣካይዱ!

ብዕለት 14 ጥቅምት 2009 ዓ.ም. ቅዱስ ሲኖዶስ፡ ኣብቲ ዓበይቲ መንፈሳውያን መደባት ዝፍጸመሎም ዘሎ፡ ኣብ ዝበዝኀ ትኅዝቶኡ ኣብ ምፍጻም ዝርከብ ዘመናዊ ሕንፃ መንፈሳዊ ኮሌጅ ከምኡ’ውን ኣብ ምቋም ዝርከብ ገዳም ደብረ ደናግል ምብጻሕ ሥራሕ ኣካይዱ።

ዓመት መጸ 14 ጥቅምት ዝኽበር ክብረ በዓል ጻድቅ አቡነ አረጋዊ ብድምቀት ተባዒሉ!

ዓመት መጸ 14 ጥቅምት ክብረ በዓል ጻድቅ አቡነ አረጋዊ፡ ብዓቢይ መንፈሳዊ ድምቀት ኣብ ኵለን ኣብያተ ክርስቲያን ተኸቢሩ። ብፍላይ ኣብተን ብስም ኣቡነ ኣረጋዊ ዝጽውዓ ኣብያተ ክርስቲያን፡ ካብ ዋዜማ ጀሚሩ፡ ምሉእ ለይቲ ስብሐተ ማኅሌት ምስጋና እግዚአብሔር በጺሑ። ኣብ ጸሎተ ቅዳሴን ዑደተ ታቦትን’ውን ዕፁብ ግብሪ እግዚአብሔር ኣብ ልዕሊ ቅዱሳኑ ዝገልጽ ጣዕመ ዜማን ጸሎትን ስብከትን ተኻይዱ።

ልኡኽ ቅዱስ ሲኖዶስ፡ ሓዋርያዊ ዑደት ኣብ ሕቡራት መንግሥታት ኣሜሪካን ካናዳን የካይድ ኣሎ!

ብብፁዕ ኣቡነ ባስልዮስ ዋና ኣመኃዳሪ መንበረ ፓትርያርክን ጳጳስ ዞባ ዓንሰባን፡ መምህር መልከጼዴቅ ኣባል ቅዱስ ሲኖዶስን ኣበምኔት ገዳም ደብረ ድኁኃን ኣቡነ ዮናስን ዝተመርሐ ልኡኽ ሲኖዶስ ሓዋርያዊ ዑደት ኣብ ሕቡራት መንግሥታት ኣሜሪካን ካናዳን የካይድ ኣሎ።

ዝክረ በዓል ኣቡነ ኤዎስጣቴዎስ 18 መስከረም፦ ኣብ ሾብዓተ ገዳማት ደቂ ኣቡነ ኤዎስጣቴዎስን ደብረ መድኃኒት ኣቡነ ኤዎስጣቴዎስ ቤተ ክርስቲያን ጎዳይፍን ብዓቢይ መንፈሳዊ ድምቀት ተኸቢሩ። ብፍላይ ድማ ኣብ ደብረ መድኃኒት ኣቡነ ኤዎስጣቴዎስ ቤተ ክርስቲያን ጎዳይፍ ብፁዕ ኣቡነ ሉቃስ ዋና ጸሓፊ ቅዱስ ሲኖዶስ ክርከቡ ከለዉ፡ ኣብ ገዳም ደብረ ድማኅ ኣቡነ መርቆርዮስ ድማ ብፁዕ ኣቡነ ባስልዮስ ዋና ኣመኃዳሪ መንበረ ፓትርያርክ ተረኺቦም ነይሮም።

በዓል ቅዱስ መስቀል ብዓቢይ ድምቀት ተባዒሉ!

ዓመት መጸ 17 መስከረም ብዓቢይ ድምቀት ኣብ ኵለን ኣብያተ ክርስቲያን ክበዓል ከሎ፡ ብፍላይ ግና ኣብ ሀገረ ስብከት ኣሥመራ ኣብ ሜዳ ባሕቲ መስከረም ብፁዓን ጳጳሳትን ውሉደ ክህነትን፡ ሰበ ሥልጣን መንግሥትን መራሕቲ ሃይማኖትን ዲፕሎማሰኛታትን ምእመናንን ምእመናትን ኣብ ዝተረኽቡሉ 17 መስከረም 2009 ዓ.ም. ብዓቢይ ክብሪ ተባዒሉ።