ልኡካን ቅዱስ ሲኖዶስ ዝተሳተፍዎ መበል 13 ሓፈሻዊ ዓመታዊ ጉባኤ ሃገረ ስብከት ኣመሪካን ካናዳን ተቓኒዑ!

ልኡካን ቅዱስ ሲኖዶስ፡ ብፁዕ ኣቡነ ጴጥሮስ ጳጳስ ሃገረ ስብከት ማእከል፡ ብፁዕ ኣቡነ ኣትናቴዎስ ጳጳስ ሃገረ ስብከት ሰሜናውን ደቡባውን ቀይሕ ባሕሪ፡ ቀሲስ በረኸት ኪዳነ ኃላፊ ወፃኢ ዝምድናታት ዘመንበረ ፓትርያርክ ዝተሳተፍዎ መበል 13 ሓፈሻዊ ጉባኤ ሃገረ ስብከት ኣመሪካን ካንዳን ኣብ መካነ ሕይወት ቅድስት ሥላሴ ቤተ ክርስቲያን ሲፎልስ ሳውዝ ዳኮታ ብዕለት 30 ጥቅምት ክሳዕ 1 ኅዳር 2011 ዓ.ም. (8-9 ኅዳር 2018 ዓ.ም.ፈ) ተቓኒዑ።

በስመ አብ ወወልድ ወመንፈስ ቅዱስ አሐዱ አምላክ!

“እምግብጽ ጸዋዕክዎ ለወልድየ/ ንወደይ ካብ ግብጺ ጸዋዕክዎ” ሆሴ. 11፡1

ነዚ ቃል ትንቢት እዚ ኣቐዲሙ ዝተዛረበ፡ ሓደ ካብ ደቂቀ ነቢያት ብዝኾነ ብነቢይ ሆሴዕ እዩ። እዚ ቃል’ዚ ዘረድኦ ድማ ጐይታናን መድኃኒናን ኢየሱስ ክርስቶስ ካብ ዝተወልደሉ ቤተ ልሔም ናብ ምድረ ግብፂ ከም ዝተሰደ እዩ።

ጐይታናን ኣምላኽናን መድኃኒናንን ኢየሱስ ክርስቶስ ካብ ኣዴና ቅድስት ድንግል ማርያም ብድንግልና ተፀኒሱ ኣብ ቤተልሔም ምስ ተወልደ፡ ካብ ርሑቕ ምሥራቕ ዝመጹ ሰብኣ ሰገል፡ “ እቲ ዝተወልደ ንጉሥ ኣይሁድ ኣበይ ኣሎ፧” እናበሉ ኽሰግድሉን ሥርዓተ ኣምልኾ ኽፍጽምሉን መጽኡ። ነዚ ዜና’ዚ ዝሰምዐ በቲ ጊዜ’ቲ ንጉሥ ዝነበረ ሄሮድስ፡ እቲ ዝተወልደ ሕፃን ንሥልጣኑ ዘኅድግ ምድራዊ ንጉሥ መሲልዎ፡ ነቲ ዝተወልደ ንጉሥ ኣይሁድ ክርስቶስ ንምቕታል ናብቲ ዝተወልደሉ ምድረ ይሁዳ ቤተ ልሔም ሠራዊቱ ኣኽቲቱ፡ ክልተ ዓመትን ካብኡ ንታሕትን ንዝነበሩ 144,000 ሕፃናት ኣቕተለ።

በስመ አብ ወወልድ ወመንፈስ ቅዱስ አሐዱ አምላክ!

ነቢይ ዕንባቆም

ዕንባቆም ማለት ማእምር፡ ለባዊ ነባቢ ማለት እዩ። ካብ ነገደ ስምዖን ካብ ኣቦኡ ናኮርን ኣደኡ ሬፋን ተወልደ። ኣብ ዘመነ ሕዝቅያስ ዝተንሥአ ነቢይ እዩ።

እስራኤላውያን ተማሪኾም ኣብ ባቢሎን ኣብ ዝነበርሉ እዋን፡ ነቢይ ዕንባቆም ኣብ ምድረ ይሁዳ ይምህር ነበረ። ነቢይ ዕንባቆም፡ ጸብሒ ኣብሲሉ እንጌራ ፈትፊቱ ነቶም ኣብ ግራት እኽሊ ዚዓጽዱ ዝነበሩ ሰባት ንኸብጽሓሎም ኂዝሎም ኪኸይድ ከሎ ሊቀ መላእክት ቅዱስ ሚካኤል ተገሊጹ፦ “ሰድ ዘንተ ምሳሐ ለዳንኤል እኁከ ዘሀሎ ውስተ ግበ ባቢሎን/ ነዚ ምሳሕ እዚ ናብቲ ኣብ ጕድጓድ ኣናብስ ኣብ ባቢሎን ዘሎ ኃውኻ ዳንኤል ውሰዶ።” በሎ። ነቢይ ዕንባቆም ድማ “ ባቢሎንሃ ኢየአምር፡ ግበ አናብስትሂ ኢርኢኩ / ባቢሎን ኣበይ ከም ዘሎ ኣይፈልጦን እየ፣ ጕድጓድ ኣናብስት’ውን ኣይረኣኹን’’ በሎ። እቲ መልኣኽ ድማ ብጸጕሪ ርእሱ ኣንጠልጢሉ ከም ነፋስ እናፋጸየ ናብ ባቢሎን ኣብጽሖ። ናብቲ ጕድጓድ ኣናብስ ብዕጽዉ ኣትዩ ንነቢይ ዳንኤል ሂብዎ ከደ።

በስመ አብ ወወልድ ወመንፈስ ቅዱስ አሐዱ አምላክ!

አሥርቆት ዘወርኀ ዘኅዳር

ዮም ሠረቀ ለነ ወርኀ ቡሩክ ኅዳር ያብጽሐነ እስከ ወርኀ ታኅሣሥ በሰላመ እግዚአብሔር! ወርኀ ኅዳር ቡሩክ መዓልቱ ፲ ወእምዝ የሐፅፅ ወሌሊቱኒ ፲ወ፬ቱ ።

ሎሚ ቡሩኽ ወርኂ ኅዳር ብሒትልና ኣሎ እሞ ናብ ብሩኽ ወርኂ ታኅሣሥ ብሰላመ እግዚአብሔር የብጽሓና! ቡሩኽ ወርኂ ኅዳር፡ ናይ መዓልቲ 10 ሰዓት እዩ (ሰዓታት መዓልቲ ኣብዚ ወርኂ’ዚ እናጐደለ ይኸይድ።) ናይ ለይቲ ድማ 14 ሰዓት እዩ።

ልኡካን ቅዱስ ሲኖዶስ፡ ኣብ ስዊዘርላንድ ኣብያተ ክርስቲያናት ባሪኾም!

ልኡካን ቅዱስ ሲኖዶስ፡ ከም ኣካል ሓዋርያዊ ዑደቶም ኣብ ንኡስ ሃገረ ስብከት ስዊዘርላንድ ኣብያተ ክርስቲያናት ባሪኾም። ብዕለት 22 ጥቅምት 2011 ዓ.ም. (01/11/2018 ዓ.ም.ፈ.) ኣብ ከተማ ሽፋውዘን ብስም ቅዱስ ሚካኤል ታቦት፣ ብዕለት 27 ጥቅምት 2011 ዓ.ም. (06/11/2018 ዓ.ም.ፈ) ድማ ኣብ ሳንጋለን ብሽም ቅዱስ ዑራኤል ታቦት ኣእትዮም። ዝግባእ ስብሐተ እግዚአብሔር፡ ጸሎተ ቅዳሴን ቃለ ቡራኬን ድማ ቀሪቡ።

ብዕለት 24 ጥቅምት 2011 ዓ.ም. (03/11/2018 ዓ.ም.ፈ) ነቶም ኣብ ኣብያተ ክርስቲያናትን ማኅበራትን ስዊዘርላንድ ከምኡ’ውን ሃገራት ጥልያን፣ ዓዲ እንግሊዝን ጀርመንን ክመሃሩ ዝጸንሑ 54 ተማሃሮ ብመዓርገ ዲቁና፣ 7 ዲያቆናት ድማ መዓርገ ክህነት ሥርዓተ ሢመት ተፈጺምሎም።

ብተወሳኺ’ውን ልኡካን ቅዱስ ሲኖዶስ፡ ብዕለት 07/11/2018 ዓ.ም.ፈ. ኣብ መድኃኔ ዓለም ቤተ ክርስቲያን ዙሪኽ ኣብ ጉባኤ ትምህርቲ ሰንበት ብምስታፍ ኣባታዊ ቃለ ምዕዳንን ቡራኬን ሂቦም።

ብሓፈሻ ንኡስ ሃገረ ስብከት ስዊዘርላንድ ትሽዓተ ኣብያተ ክርስቲያንን፣ 10 ማኅበራትን ዝጥርንፍ ንኡስ ሃገረ ስብከት እዩ።

ሓፈሻዊ መንፈሳዊ ጉባኤ ሃገረ ስብከት ኤውሮጳ ተቓኒዑ!

ልኡካን ቅዱስ ሲኖዶስ ዝተረኽብሉ፡ ዓመታዊ ሓፈሻዊ መንፈሳዊ ጉባኤ ሃገረ ስብከት ኤውሮጳ ብዕለት 23-24 ጥቅምት 2011 ዓ.ም. (03-04/11/2018 ዓ.ም.ፈ) ኣብ ጥቓ ከተማ ሉዘርን (ስዊዘርላንድ) ዝርከብ ገዳም ስዊዘርላንድ ተኻይዱ።

ኣብዚ ጉባኤ’ዚ ካብ ኵለን ኣብ 15 ሃገራት ምዕራብ ኤውሮጳ ዝርከባ ንኡሳን ሃገረ ስብከታትን፣ ሰበኻ ጉባኤታትን ዝተወከሉ ኣስታት 150 ሰባት ተሳቲፎም።