በስመ አብ ወወልድ ወመንፈስ ቅዱስ አሐዱ አምላክ!

መርሐ ግብር ጸሎተ ፍትሐትን ሥርዓተ ቀብርን ብፁዕ ኣቡነ ኣትናቴዎስ

ዝፍጸመሉ ዕለት፦ ሠሉስ 13 ግንቦት 2011 ዓ.ም.ግ. (21/05/2019 ፈ.)
ዝፍጸመሉ ቦታ፦ ርእሰ ኣድባራት ደብረ ጽዮን ቅድስት ማርያም ቤተ ክርስቲያን ኣሥመራ

• ኣብ ኵለን ኣብያተ ክርስቲያን ናብ ሠሉስ 13 ግንቦት 2011 ዓ.ም.ግ. (21/05/2019ፈ.) ዘውግሕ ለይቲ ዓሰርተው ክልተ ጊዜ ደወል ብምድዋል ጸሎተ ፍትሓት ብፁዕ ኣቡነ ኣትናቴዎስ ክጽለ ይኃድር።

• ብፍላይ ኣብ ርእሰ ኣድባራት ደብረ ጽዮን ቅድስት ማርያም ቤተ ክርስቲያን (ኣሥመራ) መምህራን ሊቃውንትን ውሉደ ክህነትን ስብሓታትን ጸሎተ ፍትሓትን የብጽሑ።

• ለይቲ ሰዓት 3፡00 ቅ.ቀ፡ ኣስከሬን ብፁዕ ኣቦና ካብ መንበሪ ቤቶም ብብፁዓን ኣቦታት ተዓጂቡ ኣብ ርእሰ ኣድባራት ደብረ ጽዮን ቅድስት ማርያም ቤተ ክርስቲያን ምስ በጽሐ፡ ካብ ቀጽሪ ክሳብ ውሽጢ ቤተ ክርስቲያን ፃዕዳ ልብሰ ተክህኖ ለቢሶም ካህናት ጽንሓሕ ዲያቆናት ድማ ወርቂ መስቀል ኂዞም ጥዋፍ እናብርሁ ብየማነ ጸጋም ተሠሪዖም፣ ከምኡ ድማ ተማሃሮ ትምህርተ ሰንበት ጥዋፍ ኣብሪሆም ይቕበሉ።

• ሰዓት 4፡00 ቅ.ቀ. ብመሪሕነት ብፁዓን ሊቃነ ጳጳሳትን ጳጳሳትን ጸሎተ ፍትሓት ይበጽሕ።

• ሰዓት 6፡00 ቅ.ቀ. – 7፡30 ቅ.ቀ. ብመሪሕነት ብፁዓን ሊቃነ ጳጳሳትን ጳጳሳትን ጸሎተ ቅዳሴ ይሥራዕ።

• ሰዓት 7፡30 ቅ.ቀ. ፡ መራሕቲ ሃይማኖታትን ሰበ ሥልጣን መንግሥትን ናይ ክብሪ ዕዱማትን ንሬሳ ብፁዕ ኣቡነ ኣትናቴዎስ ናይ መወዳእታ ፈነወ (Final Respect) ምስ ገበሩ ዜና መዋዕል ብፁዕ ኣቡነ ኣትናቴዎስ ይንበብ።

• 8፡45 ቅ.ቀ. – 9፡30 ቅ.ቀ ሬሳ ብፁዕነቶም ኣብ ቀጽሪ ቤተ ክርስቲያን ርእሰ ኣድባራት ደብረ ጽዮን ቅድስት ማርያም ቤተ ክርስቲያን ምስ ዞረ ኣብ ዝተዳለወ መቃብር ሥርዓተ ግብኣተ መሬት ይፍጸም።

ኦ ጐይታ ንብፁዕ ኣቦና ዕረፍቲ ነፍሲ፡ ንኣና ድማ በረከቶም ኣኅድረልና!

ወስብሐት ለእግዚአብሔር!

በስመ አብ ወወልድ ወመንፈስ ቅዱስ አሐዱ አምላክ!

ዜና መዋዕል እምልደት እስከ ዕረፍት ብፁዕ ኣቡነ ኣትናቴዎስ ጳጳስ ሃገረ ስብከታት ሰሜናውን ደቡባውን ቀይሕ ባሕሪ
(፲፱፻፴፭- ፳፻፲ወ፩ ዓ.ም. ግ/ 1943-2019 ፈ. )

ብፁዕ ኣቡነ ኣትናቴዎስዮስ ካብ ኣቦኦም ስብሓትለአብ በርሀን ኣደኦም ወይዘሮ ኣብርሃት ኃይለን ኣብ ዓዲ ገረብእኖ ብ13 ሰኔ 1935 ዓ.ም.ግ (20/06/1943 ዓ.ም.ፈ.) ተወልዱ። ኣገልጋሊ እግዚአብሔር ንክኾኑ ስሞም ‘ገብረ እግዚአብሔር’ ተባሂሎም ኣብ ኣርብዓ መዓልቶም ኣብ ቅዱስ ሚካኤል ቤተ ክርስቲያን (ገረብእኖ) ተጠሚቖም ጸጋ ጥምቀት ተቐበሉ። ብፁዕ ኣቡነ ኣትናቴዎስ ምስ ሥድራኦም ዓብዮም፡ ዕድሜኦም ንትምህርቲ ምስ ኣኸለ፡ ናብ ገዳም ደብረ ቢዘን ኣተዉ።

ብዝያዳ ካብ የኔታ ገብረ መስቀል ንባብ ግእዝን ጸዋትወ ዜማን ጸሎተ ሰዓታትን ኣዕማደ ምሥጢርን ተማህሩ። ብ1950 ዓ.ም. (1957 ዓ.ም.ፈ) መዓርገ ዲቁና ካብ ኣቡነ ማርቆስ ቀዳማይ ጳጳስ ዘኤርትራ ኣብ ደብረ ቢዘን ተሠይሙ። መንፈሳዊ ትምህርቲ እናተማህሩን ብርድእና እናኣገልገሉን ጸኒሖም፡ ኣብ 1955 ዓ.ም. (1963 ዓ.ም.ፈ.) ኣስኬማ ዘመላእክት መዓርገ ምንኩስና ካብ መምህር ተወልደብርሃን (ደኃር ብፁዕ ወቅዱስ ኣቡነ ፊልጶስ ቀዳማይ ፓትርያርክ) ተቐቢሎም ‘ኣባ ገብረእግዚአብሔር’ ተባህሉ። ቀጺሎም’ውን ብ1956 ዓ.ም. (1964 ዓ.ም.ፈ) ብኢድ ብፁዕ ኣቡነ ኣትናቴዎስ ኣብ ኣሥመራ መዓርገ ክህነት ተቐብኡ።

ዝክረ በዓለ ዕረፍት አቡነ ብፁዐ አምላክ ኣብ ገዳማት ደብረ ምዕዋንን ደብረ ኰዳዱን ብድምቀት ተባዒሉ!

ኣብ ገዳም ደብረ ምዕዋን ብፁዕ ኣቡነ ቄርሎስ ሊቀ ጳጳስ ሀገረ ስብከት ደቡብ ዓዲ ቀይሕ፡ ብፁዕ ኣቡነ ባስልዮስ ዋና ኣመኃዳሪ ቤት ጽሕፈት መንበረ ፓትርያርክ፡ ብፁዕ ኣቡነ ጴጥሮስ ጳጳስ ዞባ ማእከል፣ ከምኡ’ውን ኣብ ገዳም ደብረ ኰዳዱ ብፁዕ ኣቡነ ዮሓንስ ሊቀ ጳጳስ ሀገረ ስብከት ደቡብ ድባርዋን ብፁዕ ኣቡነ ሉቃስ ዋና ጸሓፊ ቅዱስ ሲኖዶስ፡ ኣብ ክልተኡ ገዳማት ካብ ዝተፈላለየ ቦታ ዝመጹ ኣበምኔታት ገዳማትን ገዳማውያንን ሊቃውንትን ውሉደ ክህነትን፡ ምእመናንን ምእመናትን ኣብ ዝተረኽቡሉ 09 ግንቦት ብኽብሪ ተባዒሉ።

ዜና ዕረፍት ብፁዕ አቡነ ኣትናቴዎስ

‘በድርየኒ ፈጸምኩ/ ጕያይ ፈጺመ እየ’ (2ይ ጢሞ. 4፡7)

ጳጳስ ሃገረ ስብከታት ሰሜናዊን ደቡባዊን ቀይሕ ባሕሪ ዝኾኑ ብፁዕ ኣቡነ ኣትናቴዎስ ብዝኃደሮም ሕማም ኣብ ውሽጥን ወፃእን ሃገር ኽሕከሙ ድኅሪ ምጽናሕ፡ ትማሊ ዓርቢ 09 ግንቦት 2011 ዓ.ም. (17/05/2019 ዓ.ም.ፈ.) ምሸት ሰዓት 10፡00 ድ.ቀ ኣብ ኣሥመራ ኣብ መበል 76 ዓመት ዕድመኦም ዓሪፎም ኣለዉ።

መርሐ ግብር ሥርዓት ቀብሪ ብፁዕ ኣቦና ምስ ታሪኽ ሕይወቶም፡ ቅዱስ ሲኖዶስ ንሕዝበ ክርስቲያን ኣብ ጊዜኡ ኪገልጽ እዩ።

ኦ እግዚኦ አዕርፍ ነፍሰ አቡነ ኣትናቴዎስ/

ኦ ጐይታ ነፍሲ ኣቦና ኣትናቴዎስ ኣዕርፍ!

ሓድሽ ሕንፃ ቤተ ክርስቲያን ደብረ ሰማዕት ቅዱስ ቂርቆስ ደቀምሓረ (ደምበዛን) ተመሪቑ!

ብዕለት 04 ግንቦት 2011 ዓ.ም. ኣብ ሃገረ ስብከት ዓንሰባ ንኡስ ሃገረ ስብከት ዓተከሌዛን - ደቀምሓረ ደምበዛን ብስም ቅዱስ ቂርቆስ ሓድሽ ሕንፃ ቤተ ክርስቲያን ተመሪቑ። ኣብዚ ሥርዓተ ምረቓ ዋና ኣመኃዳሪ መንበረ ፓትርያርክን ጳጳስ ሀገረ ስብከት ዓንሰባን ብፁዕ ኣቡነ ባስልዮስ ፣ ጳጳስ ሀገረ ስብከት ማእከል ብፁዕ ኣቡነ ጴጥሮስ፣ ኣበምኔት ገዳም ደብረ ሲና ፣ ሊቀ ካህናት ሃገረ ስብከት ዓንሰባ፣ ካብ ርኁቕን ቀረባን ዝመጹ ውሉደ ክህነትን፡ ምእመናንን ምእመናትን ናይቲ ዕለት በረኸት ተሳተፍቲ ኮይኖም።

በስመ አብ ወወልድ ወመንፈስ ቅዱስ አሐዱ አምላክ!

'ትንሣኤ ልቡና'

ሽግር’የ ረኺበ ኣነ ጉዳመኛ

ብገጸይ መንፈሳዊ ውሽጠይ ግና ዓመጸኛ

      ፍርሐት ኣምላኽ ይሰብኽ ኣፈይ ዓው ኢሉ

      ፍርሐት ናይ ውሽጠይ ግና ብስስዐ ተዓብሊሉ

ኣምላኽ ብጸጋኡ ከምዝምግብ ዘንጊዐ
ንሥጋይ ክእክብ ካብ ቤተ ክርስቲያን መመንዚዐ

      ንዘጋጥመኒ ሽግር ክንዲ ናብ ኣምላኽ ዘማኅጽኖ 

      ሕልናይ የንቅድ ክፍጽም ዝወጠኖ