Print this page

ክብረ በዓል ቁስቋም ማርያም ብድምቀት ተባዒሉ!

Nov 19, 2019

6 ኅዳር ክብረ በዓል ቁስቋም ኣብተን ብስም ቁስቋም ቤተ ክርስቲያን ኣሕኒፀን ታቦት ዘቕረጻ ክብረ በዓለን ብዓቢይ መንፈሳዊ ክብሪ ክበዓል ከሎ፡ ብፍላይ ድማ ብፁዕ ኣቡነ ጴጥሮስ ኣብ ሃገረ ስብከት ኣሥመራ ዓዲ ወኪድባ፡ ብፁዕ ኣቡነ ሉቃስ ኣብ ንኡስ ሃገረ ስብከት ዱባርዋ ዓዲ ሎጎ ማዕዶ መረብ፡ ከምኡ ውን ኣብታ ጥንታዊት ገዳም ኣረጊት ድባርዋ ብፁዓን ኣቦታት ብፁዕ አቡነ ዮሐንስን ብፁዕ አቡነ ባስልዮስን ኣብ ዝተረኽብሉ ድምቀት ተባዒሉ!

 

ኣብ ገዳም ቁስቋም ማርያም ኣረጊት ድባርዋ ብድሮ ዋዜማ ሕግን ሥርዓትን ቅድስት ቤተ ክርስቲያን ብዝሓለወ ካብ ከተማ ኣሥመራን ከባቢ ንኡስ ዞባ ድባርዋን ዝተጋብኡ መምህራን ሊቃውንትን መዘምራንን ነቲ ቅዱስ በዓል ዝምልከት ስብሐተ እግዚአብሔር ኣብጺሖም።

IMG_20191116_084121075.jpg IMG_20191116_084137024.jpg IMG_20191116_084222990.jpg

IMG_20191116_084415695.jpg IMG_20191116_091259542.jpg IMG_20191116_094229084.jpg

ብምቕጻል’ውን ናብ 6 ኅዳር ዘውግሕ ለይቲ ደወል ተደዊሉ ሊቃውንት መዘምራን ክሳዕ ወጋሕታ ያሬዳዊ ስብሓታት ምስ በጽሐ፡ ቅዳሴ ብብፁዓን ኣቦታት ተቐዲሱ ዑደተ ታቦት ተገይሩ። መዘምራን ቀቅድሚ ታቦት እናኸዱ “መሶበ ወርቅ እንተ መና ወማዕጠንታኒ ዘወርቅ፡ ተመየጢ ተመየጢ ሃሌ ሉያ ሰላመ ሰጣዊት ወንርኣይ ብኪ ሰላም/ ሃሌ ሉያ! ኣንቲ ወሃቢት ሰላም ብኣኺ ሰላም ምእንቲ ኽንረክብሲ ተመለሲ” ዝብል ንፍቕሪ ኣዴና ቅድስት ድንግል ማርያም ዝገልጽ ጣዕመ ዜማ ኣስሚዖም።

ነቲ ዕለትን ወቕትን ዝምልከት ስብከተ ወንጌል ብኃላፊ ምክትታል ኣድያማተ ስብከት ሊቀ ካህናት ቀሲስ ዘሚካኤል ኣብርሃም ንኽብርን ዕብየትን ናይቲ ክብረ በዓል ቁስቋም ዝምልከት ሕዝቢ ብተመስጦ ዝተቐበሎ ሰፊሕ ትምህርቲ ኣስሚዖም። ብድኅር’ዚ ብፁዕ ኣቡነ ዮሐንስ ሊቀ ጳጳስ ሃገረ ስብከት ድባርዋ ቃለ ቡራኬን ጸሎትን ምስ ተዋህበ እቲ በዓል ብሰላም ተፈጺሙ።

በዓለ ቁስቋም ሓደ ካብ 33 በዓላተ ቅድስት ድንግል ማርያም እዩ፡ ‘አመ ፮ ለኅዳር በዓታ ውስተ ደብረ ቁስቋም’ ከምዝብል። (መቅድመ ተአምረ ማርያም) ቅድስት ድንግል ማርያም ነቲ ናይ ሠለስተ ዓመትን መንፈቕን ስደታ ወዲኣ፡ ንመስፍን ሰላም ኣቦ ዘለዓለም ኣምላኽና ኢየሱስ ክርስቶስ ኂዛ ናብ እስራኤል ኣብ ዘቕንዓትሉ ጊዜ ደብረ ቁስቋም ኣትያ ብሓጐስ ዘዕረፈት ብሽድሽተ ኅዳር ስለዝኾነ ነዚ ንምዝካር በዓለ ቁስቋም ይበሃል።