ቅዱስ ዮሓንስ መጥምቅ

Sep 13, 2019

ናይ ዘመነ ብሉይ ዛዛሚ ናይ ዘመነ ሓዲስ ድማ ጀማሪ ኾይኑ ካብ ዘመነ ብሉይ ናብ ዘመነ ሐዲስ ፡ ካብ ነቢያት ናብ ሐዋርያት ዘሰጋገረ ዓቢይ ድንድል ቅዱስ ዮሐንስ መጥምቅ እዩ። ዕለተ ዕረፍቱ 2 መስከረም እዩ።

ሥድራ መጥምቀ መለኮት ዮሐንስ ኣቦኡ ካህን ዘካርያስን ኣደኡ ቅድስት ኤልሳቤጥን ክልተኦም ብሕጊ እግዚአብሔር ጸኒዖም ብፍቕርን ብስኒትን ብምክብባርን ብምትሕልላይን ካብ ኃጢኣት ርሒቖም ብንጽሕና ዝነብሩ ቅዱሳን ሰባት ነበሩ። ከምዚ ዓይነት ጽብቕ ሕይወት ክነብሩ ኸለዉ ግና ኣዴና ቅድስት ኤልሳቤጥ መኻን ስለዝነበረት ውላድ ኣይነበሮምን።

ካህን ዘካርያስ ኣብ ቤተ መቕደስ ከምቲ ልምዲ ኻህናት ጸሎተ ዕጣን የብጽሓሉ ኣብ ዝነበረ እዋን፡ መልኣከ እግዚአብሔር ብወገን የማን እቲ መሠውዒ ዕጣን ቆይሙ ተራእዮ። ካህን ዘካርያስ ፈርሀ፡ እቲ መልኣኽ ግና “ዘካርያስ ጸሎትካ ኣብ ቅድሚ እግዚአብሔር በጺሑ እዩ’ሞ ኣይትፍራሕ ሰበይትኻ ኤልሳቤጥ ወዲ ክትወልደልካ እያ፡ ስሙ ኸኣ ዮሐንስ ኢልኻ ክትሰምዮ ኢኻ፡ ነዓኻ’ውን ፍጹም ሓጐስ ክዀነልካ እዩ፣ ብልደቱ ኸኣ ብዙኃን ክሕጐሱ እዮም። ወይንን ሜስን ዘስክር ኮነ ዘየስክር መስተ ኣይክሰትን’ዩ ካብ ማሕፀን ኣደኡ ጀሚሩ መንፈስ ቅዱስ ዝኃደሮ እዩ። ንሱ ካብ ደቂ እስራኤል ንብዙኃን ብትምህርቱ ካብ ኣምልኮተ ጣዖት ናብ ኣምልኮተ እግዚአብሔር ካብ ገቢረ ኃጢኣት ናብ ገቢረ ጽድቅ ኪመልሶም እዩ። ከምኡ’ውን ንልቢ ኣቦታት ናብ ውሉድ፡ ንሕሊና እቶም ዘይእዙዛት ድማ ናብ ኣእምሮ ጻድቃን ኪመልስ፡ በቲ ነቢይ ኤልያስ ተመሪሑ ዝሠርሐሉ ዝነበረ ኃይሊ መንፈስ ቅዱስ ቀቅድሚ ጐይታ ክኸይድ እዩ።” በሎ።

ዘካርያስ ከኣ ነቲ መልኣኽ፡ “ኣነ ሸምጊለ እየ ሰበይተይ ከኣ መዋዕላ ኃሊፉ’ዩ እዚ ዅሉ ዝበልካኒ ከም ዝኸውን ብምንታይ ክፈልጥ’የ፧” በሎ። ሽዑ እቲ መልኣኽ “ኣነ ኣብ ቅድሚ እግዚአብሔር ዝቐውም ገብርኤል እየ፡ እምበኣርከስ ዘረባይ ስለዘይሰማዕካኒ እዚ ዅሉ ክሳዕ ዚፍጸም ዓባስ ክትከውን፡ ምዝራብ’ውን ክትስእን ኢኻ” በሎ። ድኅር’ዚ ጸሎተ ዕጣን ፈጺሙ ምስ ወፅአ ከምቲ መልኣከ እግዚአብሔር ዝበሎ ዓባስ ኮይኑ ስለዝነበረ ብኢዱ እናመልከተ ኪሕብሮም ጀመረ። መዓልትታት ኣገልግሎቱ ፈጺሙ ናብ ቤቱ ኣተወ፡ ድኅሪ ኽልተ መዓልቲ ሰበይቱ ኤልሳቤጥ ጸነሰት። ምእንቲ ክብሪ ጸሎተ ዕጣን ድኅሪ ኽልተ መዓልቲ ሕጋዊ ርክብ ፈጸሙ፡ ሎሚ’ውን እንተኾነ ምእንቲ ኽብሪ ቅዱስ ሥጋኡን ክቡር ደሙን ቅድሚ ቝርባን ሠለስተ መዓልቲ ምሕላው ይግባእ። (1ይ ሳሙ. 21፡1-6) ድኅሪ ቍርባን ከኣ ኽልተ መዓልቲ ምኽልካል ይግባእ። (ሉቃ. 1፡24)

 ስለዚ መጥምቀ መለኮት ዮሓንስ ኪጽነስ ከሎ ኣፍ ኣቦኡ ዝዓጸወ ኪውለድ ከሎ ድማ ኣፍ ኣቦኡ ዘርኃወ ቅዱስ ኣቦ እዩ። ከምኡ’ውን ናይ ሽድሽተ ወርኂ ጽንሲ ኸሎ ንድንግል ማርያም ወላዲተ ኣምላኽ ከም ዝኾነት ፈሊጡ ናይ ጸጋ ስግደት ሰገደላ። (ሉቃ. 1፡41) እቲ ‘ኣንፈርዓፀ’ ዝበሎ ኃይለ ቃል ቅዱሳን ሐዋርያት ኣብ ሲኖዶስ፡ ቅዱስ ያሬድ ከኣ ኣብ ድጓ ሰገደ ኢሎም ተርጕሞምዎ ኣለዉ። 
እዚ ኣብ ማሕፀን ኣደኡ ናይ 6 ወርኂ ጽንሲ ኸሎ ንጐይታና ኢየሱስ ክርስቶስ ናይ ባህርይ ስግደት ዝሰገደ፡ ንኣዴና ቅድስት ድንግል ማርያም ወላዲተ አምላኽ ድማ ናይ ጸጋ ስግደት ዝሰገደ መጥምቀ መለኮት ዮሓንስ ዕለት 30 ሰኔ ተወልደ።

 ካህን ዘካርያስን ቅድስት ኤልሳቤጥን ቅኑዓትን ሕያዎትን መኽበርቲ ሕጊ እግዚአብሔርን ከምዝነበሩ፡ እንተኾነ ግና መኻናት ስለዝኾኑ ውላድ ከምዘይነበሮም ተገሊጹ። ውፅኢት ፍቕሮምን ቅንዕንኦምን ትዕግሥቶምን ድማ እግዚአብሔር ኣምላኽ ንመጥምቀ መለኮት ዮሓንስ ሃቦም። ሕጂ’ውን እንተኾነ ሕዝበ እግዚአብሔር ከምዚ ዓይነት ጸገም ምስ ዘጋጥመና ብፍቕርን ብስምምዕን ብምትሕልላይን ተስፋ ብዘይ ምቝራጽን ጸግዕና ናብ እግዚአብሔር ብምግባር ብምሉእ ልብና ተመባጺዕና እንተ ደኣ ለሚንናዮ ንካህንን ዘካርያስን ንቅድስት ኤልሳቤጥን ሽግሮም ዝፈትሐ መድኃኔ ዓለም ክርስቶስ ሽግርና ከምዝፈትሐልና ዘየጠራጥር እሙን ነገር እዩ። ብዙኃት ምእመናን’ውን ኣብ ደብረ ሲናን ኣብ ከም በዓል ደብረ ሲና ዝኣመሰላ ገዳማትን ኣድባራትን ተመባጺዖም ጸገሞም ከም ዝተፈትሓሎም ኣብ ዘመና ዝረአ ሕያው ታሪኽ’ዩ።
 

ድኅር’ዚ መጥምቀ መለኮት ዮሓንስ ከምቲ ቅዱስ ወንጌል ዝብሎ ካብ ልደቱ ኣብ መበል ሻሙናይ መዓልቱ ኪገዝርዎ መጽኡ። (ሉቃ.1፡59) ብስም ኣቦኡ ከኣ ዘካርያስ ኢሎም ሰመይዎ። ኣብ ዘመነ ኦሪት ዝነበሩ ሰባት ኣብ ሻሙናይ መዓልቲ ይገዝርዎምን ይሰምይዎምን ነበሩ። ኣብ ዘመነ ሓዲስ ድማ ንወዲ ኣብ 40፡ ንጓል ኣብ 80 መዓልቶም ስም ይወሃቦም። እዚ ሕጂ ብዕለተ ጥምቀት ዝወሃብ ስም ግና ብዘይካ ካህን ዝኾነ ይኹን ስም ኪሰሚ ሥልጣን የብሉን።

ድኅር’ዚ ኽልተ ዓመት ተፈጺሙ ሰብኣ ሰገል ኃሊፎም ሄሮድስ ነቶም ሕፃናት ምስ ቀተሎም ብምኽንያት ወዱ ንካህን ዘካርያስ ኣብ ሄሮድስ ከሰስዎ። ኣብ ጊዜ ጽንሲ ኣፍ ኣቦኡ ዚዓጸወ ኣብ ጊዜ ልደቱ ኸኣ ኣፍ ኣቦኡ ዝኸፈተ ዮሓንስ ወዲ ዘካርያስ ኣሎ ኢሎም ነገርዎ። ዘካርያስ ድማ ንወዱ ዮሓንስ ኣብ ውሽጢ ቤት መቕደስ ኣብ ልዕሊ እታ ክንፍ መሠውዒ ኣቐመጦ። እቶም ወተሃደራት “ኣበይ ጌርካዮ፧” በልዎ፡ “ኣብ ውሽጢ መቕደስ ኣቲኹም ባዕልኹም ውሰድዎ” በሎም። ንቅዱስ ዮሓንስ ኪወስድዎ ኢሎም ምስ ኣተዉ፡ መልኣኸ እግዚአብሔር መንዚዑ ወሲዱ ንቅድስት ኤልሳቤጥ “ንገዳመ ሲና ኂዝክዮ ኺዲ” ኢሉ ሃባ።
 

ሠራዊት ሄሮድስ ከኣ ንቅዱስ ዮሓንስ ምስ ሰኣንዎ ንካህን ዘካርያስ ኣብ መንጎ ቤተ መቅደስን መሠውዕን ሰየፍዎ። ሽዑ እግዚአብሔር ብጥበቡ ንሥጋኡ ሠወሮ፡ ደሙ ግና እቲ ፈዳይ ሕነ ጥጦስ ክሳዕ ዝመጽእ ትጠርዕ ነበረት። ሕፃን ቅዱስ ዮሐንስ ድማ ምስ ኣደኡ ቅድስት ኤልሳቤጥ ሾብዓተ ዓመት ጸንሐ፡ ድኅሪኡ ኣደኡ ዓረፈት። ክሳዕ ኣብ እስራኤል ብትምህርቲ ዚግለጽ ኣብ በረኻታት ሲና ዓበየ።

 “በቲ ወርኃት እቲ ዮሓንስ መጥምቅ ኣብቲ ናይ ዮርዳኖስ በረኻ ይሁዳ መንግሥተ ሰማያት ቀሪባ ኣላ’ሞ ተነስሑ እናበለ” መጽአ። እዚ ድማ እቲ ብነቢይ ኢሳይያስ “ጐደና እግዚአብሔር ጽረጉ፡ መንገዱ’ውን ኣቕንዑ፡” ኢሉ ኣብ በረኻ ዚእውጅ ኣዋጅ ነጋሪ ተባሂሉ ዝተነግረሉ እዚ ዮሐንስ መጥምቅ እዩ። (ኢሳ. 40፡3) ክዳን ዮሐንስ ካብ ጸጕሪ ገመል፡ ዕጣቑ ድማ ፈልቍ ቈርበት፡ ቀለቡ ኸኣ ኣንቦጣን መዓር በረኻን ነበረ። ሽዑ ዅላቶም እቶም ሰብ ኢየሩሳሌምን ሰብ ይሁዳን ኣብ ከባኢ ዮርዳኖስ ዘለዉን ናብኡ ይኸዱ’ሞ ኃጢኣቶም እናተናዘዙ ኣብ ፈለግ ዮርዳኖስ የጥምቖም ነበረ። ካብ ወገን ፈሪሳውያንን ሰዱቃውያንን ድማ ምስቲ ሕዝቢ ተሓዊሶም ናብ ጥምቀቱ ኪመጽኡ ምስ ረኣዮም “ኣቱም ውሉድ ኣትማን ካብቲ ዝመጽእ መከራን መቕሠፍትን ስቃይን ክትመልቁ’ ኸ መን ሓበረኩም፣ እምበኣርከስ ንንስሓ ዚበቅዕ ጽቡቕ ሥራሕ ሥርሑ” በሎም። ኣብርሃም ዝኣክል ኣቦ ከለናስ ውሉድ ኣትማን ክብለና ከምዝብልዎ ፈሊጡ “ግብሪ ኣብርሃም እንተ ዘይጌርኩም ደቂ ኣብርሃም ኢና ብምባል ጥራይ እትድኅኑ ኣይምሰልኩም፡ እግዚአብሔር ንኣብርሃም ካብዘን ኣእማን ውሉድ ከተንሥኣሉ ከምዝኽእል እብለኩም ኣሎኹ” ኢሉ ኣትሪሩ ወቐሶም።

እምበኣርከስ ካብዚ ኃይለ ቃል እዚ እንታይ ኢና ንመሃር፧ ብዘይካ ብምሕረት እግዚአብሔር ብጸሎት ቅዱሳንን እንተዘይኾይኑ ብዋላ ሓደ ክንምካሕ ከምዘይግብኣና እዩ። ብሃብትና፡ ብጥበብና፡ ብኃይልና፡ ብሥልጣና ትምክሕቲ እንተ ኣሊና ግና ንድኅሪት ተመሊስና ጠባይ ናይዞም ውሉድ ኣትማን ዝተባህሉ ሰባት ለቢስና ኣሎና ማለት እዩ፡ ንሳቶም ደቂ ኣብርሃም ከለዉ ግብሪ ኣብርሃም ብዘይምስዓቦም ከምዝተወቕሱ ንሕና’ውን ኦርቶዶክሳውያንን ተዋሕዶ ከለና ኦርቶዶክሳዊት ተዋሕዶ ሃይማኖት እትእዝዞ ሕግን ሥርዓትን እንተዘየማሊእና ዘለዓለማዊ መቕጻዕትን ወቐሳን ከምዘሎና ክንዝንግዕ የብልናን።
 

“እንሆ ማሕጸ ናብቲ ጕንዲ ኦም ተነቢሩ ኣሎ” ማለቱ ሥልጣነ እግዚአብሔር ካብ ኣብርሃም ኪፈልየኩም ተዳልዩ ኣሎ ዝብል መልእኽቲ ኣመኃላለፈ። “ኣነስ ንእኡ ምእንቲ ክትቅበልዎ ብማይ ንስሓ ኣጥቐኩም ኣለኹ” ድማ በለ። እቲ ድኅረይ ዚመጽእ ግና ካባይ ይኅይል እዩ ሕራይ እንተበልክምዎ፡ ብመንፈስ ቅዱስ ከጥምቐኩም’ዩ እንተ ኣቤኹም ግና ብገሃነመ እሳት ክቐጽዓኩም’ዩ፡ ዓውዱ ዘጽርየሉ መስአ ኣብ ኢዱ ኣለዎ ነቲ ሥርናይ ኣብ ቆፎኡ ይእክቦ፡ ነቲ ሓሰር ግና ብዘይጠፍእ ሓዊ ከንድዶ እዩ። እዚ ማለት ከኣ ነቶም ከም ሥርናይ ጽሩይ ሥነ ምግባር ዘለዎም ምእመናን መንግሥተ ሰማያት ከውርሶም ከሎ፡ ነቶም ንሰብነቶም ኣብ ሓሰር ኃጢኣትን ኣብ ክርዳድ ተንኰልን ዘዋፈሩ ሰባት ከኣ ኣብ ገሃነመ እሳት ኣብቲ ናይ ዘለዓለም ሥቓይን መከራን ከምዚድርብዮም እዩ ዚገልጽ።

በቲ ጊዜ’ቲ ጐይታና ኢየሱስ ወዲ 30 ዓመት ምስ ኮነ፡ ኣብ ፈለግ ዮርዳኖስ ብኢድ ዮሓንስ ኪጥመቅ ካብ ገሊላ ናብ ዮርዳኖስ መጽአ። መጥምቀ መለኮት ዮሐንስ ንመድኃኔ ዓለም ክርስቶስ ኣጥሚቑ መንፈስ ቅዱስ ብምስሊ ርግቢ ኣብ ርእሱ ኪዓልብ ረኣየ፣ “እንሆ እቲ ብእኡ ዝተሓጐስኩ ዘፍቅሮ ወደይ እዚ እዩ” ዝብል ድምፂ’ውን ሰምዐ። ክሳዕ’ዚ ዕለት’ዚ ብዛዕባ ንስሓ ኣርእስቲ ጌሩ ቅድሚ ጐይታ 6 ወርኂ ዝመሃረን ዝገሠጸን መጥምቀ መለኮት ዮሓንስ ዓመጸኛ ንጉሥ ሄሮድስ ኣብ ትሕቲ ቐይዲ ኣእተዎ። ጐይታ ኢየሱስ ሽዑ ዮሐንስ ምስ ተኣስረ ትምህርቲ ጀመረ (ማቴ. 4፡12-17) ቅዱስ ዮሐንስ ዝተኣስረሉ ምኽንያት ብዛዕባ ሄሮድያዳ ሰበይቲ ፊልጶስ እዩ። ሰበይቲ ኃውኻ ፊልጶስ ከተእቱ ኣይግብኣካን እዩ ኢሉ ኣትሪሩ ተቓወሞ፡ በዚ ምኽንያት እዚ ኣብ ቤት ማእሰርቲ ኣእተዎ። 
 

ካብ ዕለታት ሓደ መዓልቲ ሄሮድስ ንሄሮድያዳ “እዚ ነቢይ ከይወቕሰኒ ኢለ እየ እምበር ብሓቂ እየ ዘፍቅረኪ” በላ። ንሳ ድማ እዚ ደኣ’ሞ እንታይ ግድኻ ዕለተ ልደትካ እተኽብረሉ መዓልቲ ቐሪቡ እዩ፡ ጓለይ ኣብኡ መጺኣ ትሳዕስዓልካ ንስኻ ኸኣ ዝለመንክኒ ክህበኪ እየ ኢልካ ቓል እተወላ፡ ንሳ ኸኣ ርእሲ ዮሐንስ ቈሪጽካ ሃበኒ ክትብለካ እያ” በለቶ። “ርእሲ ዮሓንስ ቈሪጽካ ትህባ ንሕና ድማ ሓሳብ ልብና ንፍጽም” በለቶ። ሽዑ ሄሮድስ ሠባብሕቲ ሓሪዱ፡ ሜስ ኣድሪቑ፡ ክንደይ ዓበይትን መኳንንትን ኣኪቡ ይሕጐሰሉ ኣብ ዝነበረ እዋን ጓል ሄሮድያዳ መጺኣ ሳዕሰዐትሉ፡ ንሱ ድማ “ዝለመንክኒ ክሳዕ ፍርቂ መንግሥተይ ክህበኪ እየ፡” ኢሉ ቓል ኣተወላ። ሽዑ ተመሊሳ ኸይዳ ነዲኣ ሓተተታ፡ ኣደኣ ድማ “ርእሲ ዮሓንስ ቈሪጽካ ሃበኒ በልዮ” ኢላ መኸረታ፡ ንሳ ኸኣ ኣደ፡ “ርእሲ ዮሓንስ ኣይለሓስ ኣይቅመስ፡ እንታይ ክኾነና” በለታ። ኣደኣ ኸኣ ርእሲ ዮሐንስ እንተ ደኣ ተቘሪጻ መንግሥትነቱ ኣብ ትሕቲ ቍጽጽርና ምዃኑ’ዩ ኢላ ኣእሚና መኺራ ሰደደታ።

ብመሠረት እቲ ዝተዋህባ ምኽሪ ከይዳ “ርእሲ ዮሓንስ ቈሪጽካ ሃበኒ” በለቶ። ‘ወተከዘ ንጉሥ በእንተ መሐላሁ ወበእንተ እለ ይረፍቁ ምስሌሁ’ ከምዝብል፡ ንጉሥ ሄሮድስ፡ እቶም ምስኡ ረፊቖም ዝነበሩ ‘ቃሉ ለዊጡ ማሕላኡ ኣፍሪሱ’ ፡ በቲ ሓደ ወገን’ውን ‘ነቢየ እግዚአብሔር ኣቕቲሉ’ ኪብሉኒ እዮም ኢሉ ተከዘ። ተኪዙ ኣይተረፈን ሽዑ ወተሃደራት ልኢኹ ‘ርእሲ ዮሓንስ መጥምቀ መለኮት ቈሪጺኩም ሃብዋ’ ኢሉ ኣዘዘ። እቶም ዝተኣዘዙ ወተሃደራት ቅዱስ ዮሓንስ ኣብ ቤት ማእሰርቲ ኸሎ ርእሱ ቘሪጾም ኣብ ጻሕሊ ጌሮም ሃብዋ። ንሳ ኸኣ ወሲዳ ነዲኣ ሃበታ፡ ኣዲኣ ድማ ትሰፊ ነበረት’ሞ “ኣንቲ ንጉሥን ንግሥትን ክትዘልፊ ዘይትሓፍሪ ዝነበርኪ ልሳን ዮሓንስ ሕጂዶ ብሞት ተኣሲርኪ” ኢላ በቲ ዝኃዘቶ መስፈ እንተ ተንከፈት እታ ርእሲ ክልተ ክንፊ ኣውፂኣ፡ ነቲ ሕንፃ ኣዳራሽ ሰንጢቃ ነፊራ ከደት። ጐይታ ኣብ ደብረ ዘይት እናመሃረ ኸሎ ከይዳ ሰገደትሉ፡ ጐይታ ድማ ርእሲ ዮሓንስ “በዚ ዘለኽዮ ጸኒዕኺ መሃሪ” ኢልዋ፡ “ሰበይቲ ኃውኻ ከተእቱ ኣይግባእን እዩ” እናበለት 15 ዓመት ዘይራ ምሂራ፡ ኣብ ብሔር ዓረብያ ዓረፈት። ነጋዶ ኪኃልፉ ኸለዉ ከም ዕንቍ ከተብርህ ርእዮምዋ ንደቀ መዛሙርቱ ርእሲ መምህርኩም ወዲቓ ኣላ ኢሎም ነገርዎም’ሞ ንሳቶም ድማ ወሲዶም ቐበርዋ። ማቴ. 14፡10

ንሳተንከ ከመይ ኮና እንተበልና ኣደን ጓልን ሓጐሰን ኪገልጻ ኪኸዳ ኸለዋ ንሄሮድያዳ ምድሪ ተኸፊታ ወሓጠታ፡ እታ ጓላ ድማ ርእሳ ኂዛ ተረፈት። ድኅሪኡ ናብ ሄሮድስ ከይዳ “ሰበይቲ ኃውኻ ፊልጶስ ከተእቱ ኣይግብኣካን እዩ” በለቶ። ንሱ’ውን “ቅድም ኣብ ዘይነገረይ ኣእትየናኒ፡ ሕጂ ኸኣ ምሥጢር ኣውፂኤናለይ” ኢሉ ብሴፍ ኪስይፍዋ ኣዘዘ። ዝተኣዘዙ ወተሃደራት ኣብ ገምገም ቀላይ ኮይኖም ብሴፍ ምስ ወቕዕዋ ኣብቲ ቐላይ ወደቐት’ሞ ኣንበሪ ተቐቢሉ ወሓጣ።
 

ሄሮድስ’ኸ ከመይ ኮነ እንተበልና ‘ኣርጣ’ ዝስሙ ሓሙኡ፡ “እዝስ ንጓለይ ብኣመናዝር ከርግጻ” ኢሉ ካብ ገሊላ ገለ ዓድታት ኣቃጺሉ ኸደ። ሽዑ ንጉሠ ነገሥት ቄሳር ነዚ ሰሚዑ፡ እዚ ዅሉ ግዝኣተይ ከምዝድፈር ዝገብር ዘሎ ሄሮድስ’ዶ ኣይኮነን ኢሉ ናብ ከተማ ሮሜ ኣምጺኡ ካብ ሥልጣኑ ስዒሩ እንድልኩ ናብ እትበሃል ዓዲ ኣሲሩ ሰደዶ። ኣብኡ ድማ ኣብ ቤት ማእሰርቲ ሓሲኹ ጨንዩ ተበላሽዩ ብሕማቕ ኣማውታ ሞተ። እምበኣርከስ ሄሮድስ ከምቲ ቅዱስ ያሬድ ዝበሎ ፡ “ርእሲ ዓቢይ መምህር ካብ ዘቝርጽ ማሕላኡ እንተዚጠልም ምኃሾ ነይሩ። እንተኾነ ግና እቲ ኵሉ ኃዘንን ትካዘን ንሰብ ይምሰል ደኣ እምበር ብሓቂ ካብ ሕሊና ዝተበገሰ ኣይነበረን። መወዳእታኡ ኸኣ ካብ ሥልጣኑ ተሳዒሩ ኣብ ቤት ማእሰርቲ ኣትዩ ጨንዩ ተበላሽዩ ብዘስካሕኽሕ ስቅያት ሞተ።
 

ሄሮድያዳ ምስ ጓላውን እንተኾነት ከምቲ ኣቦታት ዚብልዎ “ዓሻን ከልብንሲ ዝበልዕዎ ደኣ እምበር ዝበልዖም ኣይርእዩን እዮም” ከም ዝበሃል፡ ዘይረሃጸትሉ ሃብትን መንግሥትን ክትውንን ክትብል ድርብ ክሳራ ከሲራ ኣብ መከራን ስቓይን ተሸሚማ ጠሓለት።
 

“ንሕናኸ ሕዝበ እግዚአብሔር ካብዚ እንታይ ንመሃር፧” ሄሮድስ ይኹን ሄሮድያዳ ምስ ጓላ፡ ተንኰል ምሂዞም ብኽፍኣት ተሰማሚዖም ኣጸያፊ ዝኾነ ታሪኽ ፈጺሞም ናይ ክልተ ዓለም ስደተኛታት ኮኑ። ንሕና’ውን ካብ ሰብ እንተተኃባእና ካብ እግዚአብሔር ኣይንኅባእን ኢና’ሞ ረቂቕ ምሥጢር ተጠቒምና ኢልና ንሰባት ክንጐድእ እንተተበጊስና ኣብ ልዕሊ ሄሮድስን ሄሮድያዳ ምስ ጓላን ዝወረደ ስቅያትን መቕሠፍትን ጊዜኡ ሓልዩ ኣባና ከምዚፍጸም ዘጠራጥር ኣይኮነን። እቲ ብሓቂ ዝተጓዕዘ መጥምቀ መለኮት ዮሐንስ ብሥጋ እኳ ንጊዜኡ እንተ ተሰየፈ ኃይሊ እግዚአብሔርን ሓቅነቱን ንኺግለጽ ድኅሪ ምስያፉ 15 ዓመት ምሂሩ እዩ ዝዓረፈ። ብዓለመ ነፍሲ ኸኣ ኣብታ ናይ ዘለዓለም ጸጋን ክብርን ሰፊንዋ እትነብር ዓለመ ክብር መንግሥተ ሰማይ ወሪሱ ይነብር።
 

በረኸት ቅዱስ መጥምቀ መለኮት ዮሓንስ ምስ ኵልና ይኹን!
 

እዚ ጀሚርናዮ ዘለና ዓመት፡ ዓመተ ሰላም፡ ዓመተ ጽድቅ ወበረከት ይግበረልና። 
 

ስብሐት ለእግዚአብሔር፡ ወለወላዲቱ ድንግል፡ ወለመስቀሉ ክቡር፡ አሜን!

ዘመነ ማቴዎስ 9 መስከረም 2013 ዓ.ም…

September
Saturday
19
ዝክር፦ ዘመጺል ወ፵ምእት ወ፯፻ ዕደው፡ ወሰብኡ አንስት ሰማዕታት፡ ወፋሲለደስ፡ ወተዝካረ ተአምር ዘቅዱስሚካኤል። ዘቅዳሴ ምንባብ መልእክታት፦ ሮሜ 6፡18-23 ያዕ. 1፡2-12 ግብ. ሐዋ. 13፡43-ፍጻሜ ምስባክ፦ መዝ. 66/67 ወንጌል፦ ማር. 2፡23-ፍጻሜ ቅዳሴ፦ ዘያዕብዘሥሩግ። * * *
00:00 h
Ad Right

ዜና ኅትመት

እዋናዊ ጽሑፋት

ሓድሽ ዓመት ብሓድሽ መንፈስ!

ኣብቲ ብብርሃን ዝወቀበ ዘመን ኣዳራሽ ፡ ኣርባዕተ ወንጌላውያን ከም ዕንቍ ተኾሊዖም ብሓጐስ ዝነብርሉ፡ ሓደ ንበይኑ ኣብ መደቡ ግልል ኢሉ ነበረ።...

ዓመታዊ በዓል ቤት ትምህርት ሰንበት ቅዱስ ሩፋኤል ቤተ ክርስቲያን መድኃኔ…

ብዕለት 3 ጳጕሜን 2012 ዓ.ም.ግ. “ሕይወቱ ምሉእ ንእግዚአብሔር ኣሚኑ ዝኃፈረ የለን” መጽ.ሲራ. 2፡10 ብዝብል ኃይለ ቃል ዓመታዊ በዓል ቤት ትምህርት...

ገዳም ደብረ ደናግል ሰማዕት ቅድስት ኣርሴማ ገዳመን ክሓንፃ ፕላን ኣጽዲቀን…

ናይ ደቀ ኣንስትዮ ገዳም ደብረ ደናግል ሰማዕት ቅድስት ኣርሴማ ብ29 መስከረም ብሠናይ ፍቓድ ቅዱስ ሲኖዶስ ምስ ተገደመ ቤተ ጸሎት፡ መንበሪ...

ኣብ ምድላው ዝርከብ ሥርዓተ ትምህርቲ ቤት ትምህርቲ ሰንበት ንምግምጋም ጉባኤ…

ብዕለት 4-5 ጳጕሜን 2012 ዓ.ም. ኣብ ኣዳራሽ ቤት ጽሕፈት መንበረ ፓትርያርክ ንኣብ ምድላው ዝርከብ ሥርዓተ ትምህርቲ (ካሪክሉም) ዝግምግም ጉባኤ ተቓኒዑ።...

አሥርቆት ዘወርኀ መስከረም

በስመ አብ ወወልድ ወመንፈስ ቅዱስ አሐዱ አምላክ! ዮም ሠረቀ ለነ ወርኀ ቡሩክ መስከረም ያብጽሐነ እስከ ወርኀ ጥቅምት በሰላመ እግዚአብሔር! ወርኀ መስከረም...

እንቋዕ ናብ ዘመነ ማቴዎስ 2013 ዓ.ም.ግ. ኣብጽሓና።

“ካብ ኣንስቲ ኻብ ዝተወልዱ ኻብ ዮሓንስ መጥምቕ ዚዓቢ ሓደ እኳ ኸምዘይተንሥአ ብሓቂ እብለኩም ኣሎኹ፤ኣብ መንግሥተ ሰማያት እቲ ዚንእሶ የዓብዮ” ማቴ፡11፥11  ሄሮድስን...

ዐቃቤ መንበር ዘፓትርያርክ ብፁዕ ኣቡነ ጴጥሮስ እንቋዕ ናብ ዓመተ 2013…

ዐቃቤ መንበር ዘፓትርያርክ ብፁዕ ኣቡነ ጴጥሮስ ብምኽንያት ርእሰ ዓውደ ዓመት 2013 ዓ.ም. ኣብ ዝሃብዎ ቃለ ቡራኬ፦ ንዅልኹም ኣብ ቀረባ ውሽጢ...

ባሕረ ሓሳብ ፡ ሓሳበ ዘመን ፳፻፲ወ፫/ 2013 ዓ.ም.

ቅድስት ቤተ ክርስቲያንና እትጥቀመሉ መቝጸሪ ዘመን ባሕረ ሓሳብ ይበሃል። ባሕረ ሓሳብ ማለት ቍጽሪ ዘለዎ ዘመን፤ ናይ ዘመን ቍጽሪ፤ ሓሳብ ናይ...

ብዝተፈላለየ ዐውደ ትምህርት ዝተማህሩ መምህራን ተመሪቖም!

 ኣብ መንፈሳዊ ቤት ትምህርቲ ፍኖተ ብርሃን ብትርጓሜ መጽሓፍተ ሓዲሳት ሽድሽተ ተመሃሮ፡  ብመዝገብ ቅዳሴ ድማ ሸሞንተ ተመሃሮ ብድምር 14 ተመሃሮ ብደረጃ...

ዓመታዊ በዓል ቤት ትምህርት ሰንበት አቡነ ተክለሃይማኖት ራናና ቤተ ክርስቲያን…

ብዕለት 24 ነሓሴ 2012 ዓ.ም.ግ. “ካብ ዕድኻን ካብ ኣዝማድካን ካብ ዓዲ ኣቦኻን ውፃእ” (ዘፍ. 12፡1) ብዝብል ኃይለ ቃል ዓመታዊ በዓል...

ክብረ በዓል ቅዱስ ሩፋኤል 3 ጳጕሜን ብውዳሴን ቅዳሴን ብድምቀት ተኸቢሩ!

3 ጳጕሜን ክብረ በዓል ሊቀ መላእክት ቅዱስ ሩፋኤል ኣብ ኵለን አብያተ ክርስቲያን ብስብሓታትን ጸሎተ ሰዓታትን ክኸብር ከሎ፡ ብፍላይ ኣብ ቅዱስ...

3 ጳጕሜን - ሊቀ መላእክት ቅዱስ ሩፋኤል

ቅዱሳን መላእክት፡ ልኡካን ኣገልገልቲ፡ ምሕረት እግዚአብሔር ናብ ሰባት፡ ምስጋና ልማኖ ጸሎት ሰባት ድማ ናብ እግዚአብሔር ዘብጽሑ ምእንቲ ዅሉ ፍጥረት ዝልምኑ...

  

latest articles

The Ascension of St Mary (part two)

Moreover, Whilst John the evangelist was preaching in the country of Asia, on the sixteenth day of the month of...

The Ascension of St Mary (part one)

"At your right hand stands the queen." (Psalm 45:9)IN THE NAME OF THE FATHER AND THE SON AND THE HOLY...

The Fast of Assumption of the Virgin Mary

This fast lasts from Nehassie (August) 1 to 16. Our Lady departed on 21 of Ter (January) in 50 A.D...

“Blessed is he that considereth the poor” Ps. 41:1

In the name of the Father, and of the Son, and of the Holy Spirit, One God Amen. The basic necessities...

The Apostle Saint Paul

Saint Paul was a Jew, of the tribe of Benjamin, a Pharisee, the son of a Pharisee; and his kinsfolk...

The Apostle st. Peter

Peter was from Bethsaida, and he was a fisherman.  Our Lord chose him on the second day following that whereon...

The Fast of Wednesdays and Fridays

Every week Wednesdays and Fridays are observed as fast days except during the fifty days (between Easter and Pentecost), and...

The Fast of the Apostles

The Apostles observed this fast after they received the Holy Spirit and before they set out to proclaim the Gospel...

The feast Of Pentecost

IN THE NAME OF THE FATHER AND THE SON AND THE HOLY SPIRIT, ONE GOD. On this day the Holy...

Ascension

After the Lord Jesus Christ had finished the operation of His wisdom upon earth, by His Passion, and His Death...

Tsinset (Annunciation – Feast of Incarnation)

In accordance with the cannon of the Church, one of the nine major feast days of Our Lord. it Tsinset (Annunciation...

The feast of presenting the lord Christ in the temple…

On this day we celebrate the feast of presenting the lord Christ to the temple after 40 days of his...